Hivi karibuni aliyewahi kuwa kocha wa Yanga Raul Shungu ambaye kwa sasa ni kocha msaidizi wa AS Vita, aliwapa 'mchongo' mabosi wake hao wa zamani kumnasa mshambuliaji wa FC Lupopo Mpiana Monzizi ambaye msimu huu amefunga mabao 11 kwenye ligi kuu ya DR Congo akishika nafasi ya pili nyuma ya Jackson Muleka wa TP Mazembe
Upo uwezekano mkubwa nyota huyo akasajiliwa Jangwani kama wadhamini wa Yanga, GSM watamalizana nae
Nahodha wa Yanga Papi Tshishimbi amefichua mawasiliano yake na mshambuliaji huyo aliyebainisha kuwa kama mambo yataenda sawa atatua Jangwani
"Amenipigia juzi tu hapa nimeongea kwa muda wa kutosha tu ameniambia anataka kuja hapa Yanga na sio klabu nyingine sasa kuna mambo alitaka kujua kwanza juu ya timu yetu na nimemweleza amekubali ameniambia anakuja hapa Yanga," Tshishimbi amenukuliwa na Mwanaspoti
"Mpiana ni mshambuliaji bora sana kama atakuja hapa nafikiri tangu niijue Yanga ndio watafurahi kuona kazi ya mshambuliaji halisi anayejua kupambana na kufunga ndio maana anaongoza kule Congo"
Ikumbukwe pia Yanga inafanya jitihada za kumrejesha aliyekuwa mshambuliaji wake Heritier Makambo ambapo klabu yake ya Horoya AC imeonyesha kuwa tayari kumuuza ikitaka dau linalofikia Tsh Milioni 140
GSM wamesema watamsajili mchezaji yeyote ambaye dau lake ni chini ya Milioni 500, ilimradi awe amependekezwa na kocha Luc Eymael
