Uongozi wa klabu ya Yanga umejipanga kuhakikisha wanafanya vizuri mechi zilizobaki pale ligi itakaporejea huku wakipiga hesabu kali michuano ya kombe la FA ambayo miamba hao wa soka nchini walitinga hatua ya robo fainali
Makamu Mwenyekiti wa Yanga Fredrick Mwakalebela amesema wamepokea kwa furaha tamko la Rais wa Jamhuri ya Muungano wa Tanzania Dk John Magufuli kuwa anaweza kuruhusu mashindano mbalimbali ya soka nchini yakaendelea baada ya kujiridhisha hali ya maambukizi ya ugonjwa wa corona
Amesema Yanga inasubiri tamko la TFF kufahamu ni lini michuano hiyo itarejea lakini wao wamejipanga kufanya vizuri kwani hata wakati huu ambao ligi imesimama, nyota wao wanafanya mazoezi kikamilifu
"Tumelipokea kwa furaha tamko la Rais, sasa tunajipanga kuhakikisha tunafanya vizuri kwenye ligi na Kombe la Shirikisho la Azam (ASFC) ili kupata nafasi ya uwakilishi wa kimataifa mwakani"
"Tunawasubiri TFF waseme lini tunaanza ili tujipange rasmi ila wachezaji wetu wanaendelea na mazoezi kama walivyoelekezwa," amesema Mwakalebela
Kimahesabu Yanga ina nafasi finyu ya kutwaa ubingwa wa ligi kuu wakiwa wanashika nafasi ya tatu kwenye msimamo wakikusanya alama 51 ambazo ni alama 20 pungufu ya vinara wa ligi hiyo Simba
Hata hivyo Yanga wanaweza kujihakikisha tiketi ya kushiriki michuano ya kombe la Shirikisho msimu ujao kama wataweza kutwaa taji la FA (ASFC) wakiwa wametinga hatua ya robo fainali
Droo ya hatua hiyo itafanyika Serikali itakaporuhusu kurejea kwa ligi na mashindano mengine
