Msuva haoni timu ya kuipoka Yanga ubingwa

Licha ya kuwa nchini Morocco, winga Simon Msuva amesema huwa anaifuatilia kwa ukaribu ligi kuu ya Vodacom Tanzania bara na ameitabiria Yanga, timu aliyoichezea kwa misimu mitano itahifadhi ubingwa wake kwa msimu wa nne mfululizo.

Tofauti na misimu mingine, Msuva amesema msimu huu ligi inaonekana kuwa na ushindani zaidi kwani kila timu inaonekana kujipanga vizuri.

Yanga ilianza ligi kwa kusuasua lakini sasa iko nafasi ya tatu nyuma ya Azam FC na Simba ikiwa na alama 17, alama mbili nyuma ya vinara hao wenye alama 19 kila mmoja.

"Naifuatilia ligi kupitia simu yangu ya mkononi," amesema Msuva ambaye yuko kwenye kambi ya timu ya Taifa inayojiandaa na mchezo wa kirafiki dhidi ya Benin.

"Pamoja na ushindani kuonekana kuwa mkubwa, bado Yanga ina nafasi ya kutetea taji lake kwa msimu wa nne."

"Licha ya mimi pamoja na wengine walio-ondoka, Yanga imefanya usajili makini kwani sasa wachezaji wameanza kuelewana na timu inarejea kwenye hali yake ya ushindani."

"Miaka yote ni kawaida ya Yanga kuanza ligi kwa kusuasua lakini kadiri siku zinavyosogea ndio timu inavyozidi kuimarika."

"Msimu huu nao hauna tofauti sana," amefunguka Msuva.