Kabla ya ujio wa kocha Luc Eymael kiungo kiraka Said Juma Makapu hakuwa akionekana kama ni mchezaji ambaye angeendelea kudumu Yanga kwa muda mrefu
Msimu uliopita aliongezwa mkataba wa mwaka mmoja, tena ilikuwa wakati dirisha la usajili likielekea ukingoni
Yeye na Jaffar Mohammed ni wachezaji ambao walipewa mikataba dakika za mwisho
Ukizungumzia wachezaji ambao wamekaa Yanga kwa muda mrefu, Makapu ni miongoni mwa wachezaji hao kwani alisajiliwa na Yanga tangu enzi za kocha Marcio Mexime
Kabla ya Eymael, Makapu amepita mikononi mwa Maximo, Hans van Pluijm, George Lwandamina na Mwinyi Zahera
Katika makocha wote, hakuna hata mmoja ambaye alimuhakikishia nafasi ya kudumu kwenye kikosi cha kwanza
Lakini ujio wa Eymael umekuwa na mafanikio kwake kwani ni kocha aliyeonekana kumuamini tangu alipomuona mazoezini kwa mara ya kwanza
Eymael akambadilishia majukumu kwam kurudisha kwenye nafasi ya ulinzi ambayo amekuwa akicheza ingawa sio kila mara
Kwa sasa Makapu ni mmoja wa wachezaji ambao hawana wasiwasi na maisha yao Yanga kwani anao uhakika wa kupata mkataba mpya
Makapu amesema imani aliyopewa na Eymael ilimfanya yeye mwenyewe ajiamini na kujituma zaidi ili kuhakikisha hamuangushi Mbelgiji huyo ambaye alikiri kuona kitu tofauti kutoka kwa beki huyo mstaarabu
"Namshukuru sana kocha (Eymael) amenisaidia sana, amenifanya nijiamini zaidi na kuweza kucheza kwa uhuru. Nafahamu bado sijafika ninapotaka lakini kwa usaidizi wake na ushirikiano na wachezaji wenzangu, nitaendelea kusonga mbele," amesema
Kiwango alichoonyesha Makapu tangu alipoanza kutumiwa na Eymael nafasi ya ulinzi, kilimfanya ajumuishwe kwenye kikosi cha timu ya Taifa ambacho kilipaswa kushiriki michuano ya CHAN ambayo hata hivyo haikufanyika kutokana na janga la corona
