Kiungo wa Yanga Haruna Niyonzima amesema wachezaji wote wako tayari kupambana kwenye ngwe ya lala salama ili kuhakikisha wanafikia malengo ya kukata tiketi ya kushiriki michuano ya CAF msimu ujao
Pamoja na kuwa na nafasi finyu ya kutwaa taji la Ligi Kuu, Niyonzima amesema ligi itakaporejea watapambana kuhakikisha kama wanakosa ubingwa basi wamalize nafasi ya pili
Kwa michuano ya kombe la Shirikisho la Azam, Niyonzima amesema wanahitaji kushinda taji hilo
Niyonzima ambaye siku za karibuni alijiongezea dozi ya mazoezi kwa kuweka kambi ufukweni akijifua, amesema wachezaji wote wanahimizana kufanya mazoezi wakati huu ligi imesimama ilin pale itakaporejea waweze kutimiza malengo waliyojiwekea
"Ligi itakaporejea itakuwa kama tunaanza upya msimu kwani tumekaa mda mrefu bila ya kucheza mpira. Mechi za mwanzo zitabebwa zaidi ya uwezo wa mchezaji moja mmoja sasa kwa timu ambayo wachezaji wake watakuwa wamefanya mazoezi kikamilifu, ni wazi watanufaika"
"Ndio maana sisi Yanga tuliweka mkazo mkubwa kwa kila mmoja wetu kufanya mazoezi mazuri ili tuweze kutimiza malengo tuliyojiwekea," amesema
"Pia Tunajivunia kocha wetu (Luc Eymael), amekuwa akituhimiza mara kadhaa namna ya kujiweka sawa kabla ya ligi kurejea, hivyo kila mchezaji ana hamu ya kurejea uwanjani na kusawazisha mapungufu yote yaliyojitokeza kabla ya kusimama kwa ligi, naamini tutarejea na nguvu na kuchukua Kombe la Shirikisho au kumaliza nafasi ya pili kwenye ligi"
Ili kujihakikishia nafasi ya kushiriki michuano ya CAF msimu ujao, Yanga inapaswa kushinda taji la FA kwani huenda msimu ujao Tanzania ikatoa vilabu viwili tu ikielekea kupokwa nafasi nne na Libya ambayo moja ya klabu zake ilitinga robo fainali ya michuano ya kombe la Shirikisho hivyo kuizidi alama Tanzania
Lakini mambo yanaweza kuwa tofauti kama CAF wataamua kufuta matokeo ya michuano yake ya msimu baada ya mechi zote kusimamishwa kutokana na corona
CAF wamesitisha michuano ya yote ya Kimataif huku wakiwa bado hakuna taarifa rasmi waliyoitoa kuhusu mustakabali wa michuani hiyo
