Mkurugenzi wa Mashindano klabu ya Yanga Thabiti Kandoro amesema uongozi wa timu hiyo umeweka utaratibu wa kuwafuatilia wachezaji wake ili kuhakikisha wanatekeleza program za mazoezi waliyoachiwa na kocha Luc Eymael
Kandoro amesema wakati huu ambao ligi imesimama kutokana na ugonjwa wa corona, ni muhimu kwa wachezaji kufanya mazoezi stahiki ili kulinda viwango vyao
"Tunafuatilia mazoezi ambayo wanafanya wachezaji wetu. Meneja wa timu pamoja na Daktari wanawasiliana na wachezaji moja kwa moja. Lengo ni kuhakikisha program za Mwalimu zinatekelezwa ipasavyo"
"Tunashukuru mpaka sasa hatuna majeruhi, wachezaji wana Amani wakiendelea na progam zao vyema. Kimsingi sisi tuko tayari kwa lolote, tunachosubiri ni mwongozo wa Serikali na TFF kwani wao ndio wenye kauli ya mwisho kuhusu lini ligi itarejea," Kandoro aliiambia Yanga TV
Mapema leo, Katibu Mkuu wa TFF Wilfred Kidao alibainisha kuwa wanasubiri maelekezo ya Serikali, hivyo aliwataka wadau waendelee kuwa watulivu
