Aliyekuwa mshambuliaji wa Yanga Juma Balinya amesema sababu kubwa iliyomfanya aondoke katika kikosi cha mabingwa hao wa kihistoria ni kutokubalika kwa mashabiki
Balinya aliomba mkataba wake uvunjwe na Yanga mwezi Januari baada ya kushindwa kutamba
Hata hivyo nyota huyo raia wa Uganda amefichua kuwa hakuwa na furaha pale alipoona hapewi sapoti na mashabiki wakati alipokuwa hafanyi vizuri
"Nilitamani kuendelea kubaki Yanga licha ya changamoto zilizokuwepo lakini sikuweza kwani mashabiki hawakunikubali"
"Mchezaji ni rafiki wa mashabiki kama, hawakubali kazi yako huwezi kujisikia faraja," alisema Balinya
Baada ya kuachana na Yanga, Balinya alisajiliwa na klabu ya Gor Mahia ambapo alifanikiwa kufunga mabao mawili katika mchezo wake wa kwanza ligi kuu ya Kenya
Mpaka ligi inasimama kutokana na janga la corona huko Kenya, Balinya alikuwa amefunga mabao matatu
Hata hivyo Kenya tayari wamefuta msimu wakiitangaza Gor kuwa mabingwa wakitumia sheria yao ya dharura
Balinya amesema yuko mbioni kuondoka Gor Mahia akiwa amepata ofa kutoka klabu ya Polokwane inayoshiriki ligi kuu ya Afrika Kusini
Gor Mahia inakabiliwa na changamoto ya ukata, wachezaji wengi wakidai mishahara ya hadi miezi minne
