Wakati Yanga ikihusishwa kumuwania kiungo wa Rayon Sports, Ally Niyonzima, nyota mwingine wa timu hiyo ambaye pia hucheza nafasi ya kiungo Kakule Mughen amedai kufanya mazungumzo na Mhandisi Hersi Said, Mkurugenzi wa uwekezaji GSM ambaye husimamia michakato ya usajili ambayo iko chini ya kampuni hiyo kwa niaba ya Yanga
Kuelekea kipindi cha dirisha kubwa la usajili ambalo kama isingekuwa corona lingefunguliwa mwezi Juni, wachezaji wengi wameendelea kuhusishwa na mabingwa hao wa kihistoria ambao wametangaza kukisuka upya kikosi chao kuelekea msimu ujao
Kakule mwenye asili ya DR Congo, amefichua kuwa alimtumia mhandisi Hersi clip za video zake baada ya bosi huyo kumtaka afanye hivyo
"Mkataba wangu ya Rayon unamalizika karibuni. Nilifanya mazungumzo na mwakilishi wa GSM ambaye alinitaka nimtumie video zangu, nimemtumia. Natamani kuja kucheza mpira Tanzania, niliwahi kufanya majaribio Simba lakini mambo hayakwenda kama yalivyotarajiwa. Kwa sasa bado ni mchezaji wa Rayon lakini nasubiri majibu kutoka klabu ya Yanga", alisema Kakule
Hata hivyo nyota huyo sio miongoni mwa wachezaji ambao walikuwa kwenye hesabu za kocha Luc Eymael
Rayon Sports huenda ikawapoteza wachezaji wake wengi kutokana na changamoto za kiuchumi zilizoikabili timu hiyo hata kabla ya kuibuka kwa ugonjwa wa corona
Klabu hiyo ilivunja mkataba na mshambuliaji wake tegemeo Michael Sarpong ambaye ni miongoni mwa wachezaji ambao wako kwenye rada za Yanga
