Winga wa Yanga Juma Mahadhi amesema kwa sasa amepona kabisa majeraha yake na kuwataka mashabiki wa timu hiyo wasubiri burudani kutoka kwake pale ligi itakaporejea
Mahadhi hajaonekana uwanjani kwa karibu miaka miwili akiuguza jeraha la goti alilopata August 19 2018 katika mchezo wa kombe la Shirikisho dhidi ya USMA. Mchezo ambao Yanga iliibuka na ushindi wa mabao 2-1
"Kwa sasa nipo vizuri naendelea na mazoezi binafsi. Nawaambia Mashabiki, Wanachama na wapenda soka wategemee kuniona nikirejea uwanjani ligi itakaporejea," ametamba Mahadhi
Ujio wa nyota huyo ni kama ingizo jipya kwenye kikosi cha kocha Luc Eymael, Mbelgiji huyo atamuangalia kwa jicho tofauti
Yanga imejipanga kuingia sokoni kusaka winga wa upande wa kulia, pengine itakuwa nafasi kwa Mahadhi kumuonyesha Eymael kuwa hata yeye anaimudu nafasi hiyo
Hata hivyo kwa kuwa amekaa nje kwa muda mrefu, pengine atahitaji mechi kadhaa kuweza kujiimarisha kabla ya kuonyesha makali
