Ngoma matatani Yanga

Uongozi wa Yanga umesema haukumpa ruhusa mshambuliaji wake Donald Ngoma kurejea kwao nchini Zimbabwe kujitibia kama ilivyoelezwa awali.

Katibu Mkuu wa Yanga Charles Mkwassa amesisitiza kuwa Ngoma aliachwa jijini Dar es salaam na wachezaji wengine majeruhi wakati Yanga ilipokwenda kanda ya ziwa.

Mchezaji huyo bado hajarudi na tayari Mkwassa amesema atachukuliwa hatua za kinidhamu atakaporejea kwa kitendo chake cha kuondoka kambini bila ya ruhusa.

Wakati huo huo Yanga huenda ikatumia dirisha dogo la usajili kusajili washambuliaji wawili.

Kocha Mkuu wa Yanga George Lwandamina yuko nchini Zambia alikokwenda kuhudhuria msiba wa mpwa wake, ameuagiza uongozi wa Yanga utumie dirisha dogo la usajili linalofunguliwa Jumatano ijayo kuimarisha safu ya ushambuliaji.

Yanga huenda ikasajili mshambuliaji mmoja wa Kimataifa na mmoja mzawa.

Kama hilo litafanyika, ili kuweza kupata nafasi moja ya Kimataifa, Yanga italazimika kuvunja mkataba wa mchezaji mmoja wa Kimataifa.

Tayari mlinzi wa kati raia wa DRC Fiston Kayembe amejihakikishia nafasi moja ya Kimataifa iliyokuwa imebaki kwenye kikosi cha Yanga.

Amekuwa katika kikosi hicho akifanya majaribio kwa miezi kadhaa na bila shaka atasaini mkataba wa kuitumikia Yanga.