Mshambuali wa Yanga David Molinga amesema kama mchezaji, anawaelewa mashabiki wanaomtupia lawama pale anapokuwa hafanyi vizuri
Molinga alijiunga na Yanga usajili uliopita akitokea klabu ya Reinaissance, amefunga jumla ya mabao tisa, nane kwenye ligi na moja kombe la FA
Mshambuliaji huyo mwenye 'mwili jumba', amesema mashabiki hujinyima ili kuingia uwanjani kushangilia timu zao, inapotokea wao wachezaji hawafanyi vizuri wanastahili kutukanwa
"Mimi ni mchezaji wa kigeni, nalipwa mshahara mzuri, nakaa mahali pazuri, yaani napata kila kitu. Fikiria shabiki alikuwa na elfu moja tu ndani, akaitumia kuingia uwanjani kuishangilia timu yake, inapotokea simpi furaha huyu shabiki ni sawa akinitukana"
"Nilipojiunga na Yanga mwanzoni mashabiki walikuwa hawanikubali. Wengi walisema sina uwezo lakini baada ya kucheza mechi sita, wapo waliokubali uwezo wangu. Kama mchezaji siangalii nini mashabiki wanasema juu yangu, nina wajibu wa kutimiza majukumu yangu wakati wote," alisema Molinga
Aidha Mcongomani huyo amefichua wakati akijiunga na Yanga, mkononi alikuwa na ofa kutoka klabu ya AS Vita ya huko DR Congo
"Nilitaka kujiunga na AS Vita lakini Zahera (Mwinyi) alinishawishi nije Tanzania kujiunga na Yanga, kama sio Zahera pengine nisingekuwa hapa"
Molinga ni miongoni mwa wachezaji ambao hatma zao ziko mkononi mwa kocha Luc Eymael kwani mkataba wake na Yanga unamalizika mwezi August 2020
