Keshokutwa Jumatano, mabingwa wa kihistoria Tanzania Yanga watashuka kwenye uwanja wa Kaitaba kumenyana na Kagera Sugar katika mchezo wa ligi kuu ya Vodacom
Huu ni mchezo muhimu kwa Yanga kupata ushindi ili kuweka hai matumaini ya kumaliza ligi katika nafasi nzuri
Lakini pia ni mchezo ambao utachezwa siku chache kabla ya mchezo wa nusu fainali kombe la FA dhidi ya Simba ambao utapigwa Jumapili ijayo
Ikumbukwe Yanga iliwaondoa Kagera Sugar katika mchezo wa robo fainali ambao ulipigwa uwanja wa Taifa wiki iliyopita, Yanga ikishinda mabao 2-1
Mchezo huo uligubikwa na matukio ya hapa na pale Kagera Sugar wakilalamika kuonewa na waamuzi
Hivyo Kagera Sugar watauchukulia mchezo wa keshokutwa kuwa wa kisasi hasa ikizingatiwa watakuwa wakicheza katika uwanja wao wa nyumbani
Nyota wa Yanga watapaswa kuwa makini ili kuhakikisha hawapati majeraha katika mchezo huo ambao utakuwa na presha kubwa
Kocha Luc Eymael anaweza kulazimika kufanya mabadiliko ya kikosi chake ili kuhakikisha anawalinda nyota wake kuelekea mchezo dhidi ya Simba
Yanga wakiwa tayari wamempoteza Mapinduzi Balama, kuna hofu ya kumpoteza Haruna Niyonzima aliyepata majeraha kwenye mchezo dhidi ya Biashara United jana
Majeruhi zaidi wanaweza kuiweka Yanga katika wakati mgumu zaidi kuelekea mchezo dhidi ya Simba
Yanga inahitaji kuifunga Simba ili kutinga fainali ya michuano ya kombe la FA kuwania tiketi ya kushiriki michuano ya CAF msimu ujao
