Licha ya kucheza mbele ya mashabiki wake, Kagera Sugar leo imeshindwa kufurukuta mbele ya Yanga baada ya kukubali kipigo cha bao 1-0 katika mchezo wa ligi kuu uliopigwa uwanja wa Kaitaba
Baada ya kutoa upinzani mkali kwenye mchezo wa robo fainali kombe la FA, wengi waliamini mechi ya leo isingekuwa rahisi kwa Yanga lakini mabingwa hao wa kihistoria wamedhihirisha mkubwa ni mkubwa tu
Bao la Bernard Morrison aliloweka kambani kwenye dakika ya 77 baada ya pasi ya Yikpe, lilitosha kuihakikishia Yanga ushindi muhimu ambao unawaweka katika nafasi nzuri kabla ya mchezo dhidi ya Simba Julai 12
Yanga leo ilikuwa bora kuanzia eneo la mlinda lango Farouk Shikhalo aliyeokoa nafasi kadhaa za wazi
Vijana wa Luc Eymael walishambulia kwa kasi na kuzuia pamoja pale walipopoteza mpira na hivyo kuwapa wakati mgumu Kagera Sugar kuweza kumfikia Shikhalo kwa urahisi
Ushindi huo umeirudisha Yanga katika nafasi ya pili, wanaweza kubaki katika nafasi hiyo kutegemeana na mtokeo ya mchezo kati ya Azam dhidi ya Mwadui Fc
