Yanga imefanikiwa kuondoka na alama zote tatu uwanja wa Taifa leo baada ya kuichapa Singida United mabao 3-1 katika mchezo uliopigwa majira ya saa moja usiku
Ulikuwa mchezo ambao Yanga ilihitaji kushinda kupunguza presha ya mashabiki kufutia kipigo cha aibu kutoka kwa watani zao mapema wiki hii
Winga Mrisho Ngasa alikuwa na mchango mkubwa kwenye ushindi wa mabingwa hao wa kihistoria akifunga bao moja na kutengeneza jingine
Beki Paulo Godfrey 'Boxer' ambaye kwa mara ya kwanza leo alijumuishwa kwenye kikosi na kocha Luc Eymael ndiye alianza kuifungia Yanga bao la kuongoza baada ya kumalizia mpira uliogonga mwamba baada ya shuti la Raphael Daudi
Ngasa aliweka kambani bao la pili wakati Yikpe Gnaniem leo alifunga bao safi akimpiga chenga mlinda lango wa Singida United Owen Chaima
Yikpe angeweza kuondoka na mpira leo kama angekuwa makini kutumia nafasi nyingi alizopata
Ushindi umeirejesha Yanga kwenye nafasi ya pili baada ya kufikisha alama 67 baada ya Azam Fc kuchapwa bao 1-0 na Mtibwa Sugar
Mchezo unaofuata ni dhidi ya Mwadui Fc na utapigwa Jumamosi, Julai 18
