Mshambuliaji wa zamani wa Yanga, mkongwe Mohammed Hussein 'Mmachinga' amesema soka limekuwa rahisi sana wakati huu kuliko walipokuwa wakicheza wao miaka ya nyuma
Mfumania nyavu huyo anayeshikilia rekodi ya mabao, amesema kama angekuwa anacheza zama hizi, angeweza kumaliza msimu kwa kufunga zaidi ya mabao 40
Mmachinga ndiye anayeshikilia rekodi ya ufungaji bora wa ligi kuu akipachika mabao 26 msimu wa 1997/98 wakati huo ligi kuu ikishirikisha timu 12 tu
"Nikiwatazama mabeki wa sasa ukilinganisha na wakati wetu, nafikiri ningewepo kwenye kizazi hiki ningemaliza msimu na zaidi ya mabao 40," alitamba Mmachinga
Katika maisha yake yote ya soka, Mmachinga hakuwahi kupiga mkwaju wa penati, amewapa changamoto washambuliaji wazawa kuongeza juhudi kuhakikisha hawazidiwi na wageni
"Washambuliaji wazawa ni kama wamelala kidogo katika misimu ya hivi karibuni, wanapaswa kuongeza juhudi kushindana na wenzao wageni kwani naamini uwezo wanao"
Akizungumzia rekodi yake ya mabao 26 kukaribiwa kuvunjwa na mshambuliaji wa Simba Meddie Kagere, Mmachinga amesema kama Simba itapata mikwaju ya penati mitano kwenye mchezo wao wa mwisho dhidi ya Polisi Tanzania basi ataweza kuivunja
"Mimi sikuwahi kupiga mkwaju wa penati, ni jambo ambalo sikuwa nikipendelea kufanya. Kagere ni mchezaji mzuri, anapambana sana anapokuwa uwanjani lakini penati zinachangia mabao mengi anayofunga. Hivyo kama Simba watapata penati tano kwenye mchezo wao wa mwisho, basi ataweza kuivunja"
