Kocha Msaidizi wa Yanga Charles Mkwasa amesema aliyekuwa kocha mkuu wa timu hiyo Luc Eymael alikuwa na mapungufu mengi ya kiutendaji na pengine kama yangefahamika mapema, asingeweza kudumu kwa muda aliokaa Yanga
Akizungumza kwa mara ya kwanza baada ya Yanga kutangaza kumfuta kazi Eymael, Mkwasa amesema kitendo alichofanya kocha huyo hakikuwa cha kiungwana na ulikuwa ni mwendelezo wa matukio yake mengi ya utovu wa nidhamu
"Eymael hakuwa mstaarabu, kashfa, dharau na lugha za matusi ilikuwa sehemu ya maisha yake, mambo hayo hayakuwa yakifahamika nje lakini juzi nadhani kila mmoja amebaini alikuwa ni mtu wa aina gani," alisema Mkwasa
Aidha akizungumzia mtafaruku uliojitokeza baina yake na kocha huyo, Mkwasa amesema aliamua kujiweka pembeni yeye mwenyewe baada ya kumsikia kocha huyo akisema hataki kufanya nae kazi
"Wakati nilipoambiwa niwe kocha msaidizi, nilikubali kwa kuwa nilidhani nitajifunza mambo mengi kutoka kwake. Lakini baada ya kufanya nae kazi nikabaini ni kocha mwenye uwezo mdogo sana.
"Mimi nilijaribu kutimiza majukumu yangu ya kumsaidia ili aweze kufanikiwa lakini ikafika wakati akaona kama namfundisha kazi. Hivyo alipotoa kauli kuwa hataki kufanya kazi na mimi na kuwataka viongozi wachague kati ya mimi au yeye, kuepusha mgogoro mimi mwenyewe nikaomba nikae pembeni"
"Mkataba wangu unamalizika mwezi wa nane, sijafahamu mipango ya Yanga lakini kwa sasa siko tayari kuwa kocha msaidizi tena. Kwani wakati mwingine unaweza kufanya kazi na makocha ambao umewazidi uwezo na kusababisha migogoro isiyokuwa na ulazima wowote" aliongeza Mkwasa
