Usajili wa nyota watatu uliofanywa na Yanga katika kipindi cha siku mbili, umekuwa sapraizi kwa baadhi ya wadau waliokuwa wakibeza ahadi zilizokuwa zikitolewa uongozi wa Yanga pamoja na mdhamini wao GSM
Katika misimu mitatu Yanga haikuwa na ubavu wa kichumi hivyo pamoja na kuhusishwa na wachezaji wengi, ilishindwa kukamilisha usajili wao
Lakini usajili wa beki kisiki Bakari Nondo Mwamnyeto, umetuma ujumbe kuwa Yanga imemaanisha kile walichosema
Kutua kwake Yanga kunamfanya Mwamnyeto kuwa mlinzi ghali zaidi kuwahi kusajiliwa kwenye ardhi ya Tanzania kwani usajili wake umeigharimu GSM takribani Milioni 230
Lakini pia Yanga ikafanikiwa kumsajili mmoja wa mabeki bora kabisa upande wa kushoto Yassin Mustafa ambaye walikuwa wakimfuatilia kimyakimya licha ya tetesi nyingi kumuhusisha na Azam Fc
Zawadi Mauya hakuwa maarufu sana lakini wale waliokuwa wakimfuatilia watakubali kuwa ni moja ya usajili bora sana uliofanywa na Yanga
Huyu ni mtu sahihi katika nafasi ya kiungo mkabaji, aina yake ya uchezaji unaweza kumfananisha na kiungo wa zamani wa Azam Fc Himid Mao Mkami, ni mtu wa kazi kwelikweli
Huu ni mwanzo tu kwani wanaotangazwa sasa ni wachezaji wa ndani, bado majembe ya Kimataifa hayajaanza kuwekwa hadharani bila kusahau kocha mkuu
