Baada ya kutambulishwa usajili wa nyota kadhaa wa ndani, Yanga inatarajiwa kuanza kutambulisha usajili wa nyota wake wa kigeni
Mpaka sasa Yanga imekamilisha usajili wa wachezaji wanne wa ndani ambao ni mlinzi wa kushoto Yassin Mustafa kutoka klabu ya Polisi Tanzania, mlinzi wa kati Bakari Nondo Mwamnyeto kutoka klabu ya Coastal Union
Wengine ni kiungo mkabaji Zawadi Mauya kutoka klabu ya Kagera Sugar na mshambuliaji Waziri Junior aliyetua jana akitokea klabu ya Mbao Fc ambako alimaliza msimu kwa kupachika jumla ya mabao 15 kwenye ligi na mechi za play-off
Jana baada ya kutangaza usajili wa Junior, Kaimu Katibu Mkuu wa Yanga Simon Patrick alisema sasa wanahamia upande wa nyota wa kigeni
Kumekuwa na tetesi nyingi kuwahusu baadhi ya wachezaji ambao kwa muda mrefu wamekuwa wakitajwa kumalizana na Yanga
Ukweli wa tetesi hizo utafahamika kuanzia leo Jumatatu
Mkurugenzi wa Uwekezaji GSM Mhandisi Hersi Said amesema wamefanya kile walichoahidi akiwataka mashabiki wakae tayari kuwapokea wachezaji hao
