Kikosi cha Yanga jana kilishusha shoo ya kibabe kwenye mchezo dhidi ya Aigle Noir wakicheza mechi hiyo wakiwa na takribani siku tano tu chini ya kocha Msaidizi Juma Mwambusi
Kwa wiki mbili, Yanga ilikuwa chini ya kocha wa viungo Riedoh Berdien ambapo mwanzoni mwa wiki iliyopita ndipo kocha Juma Mwambusi akaungana nae baada ya Cedric Kaze aliyekuwa akisubiriwa kuchelewa na baadae kupata udhuru ambao uliifanya Yanga imtangaze Zlatko Krmpotic kuchukua nafasi yake
Nyota wengi wa kigeni walifanya mazoezi chini ya siku saba, hivyo kwa kiasi kikubwa, ile shoo ya jana ilitokana na uwezo binafsi wa mchezaji mmoja mmoja
Kuanzia leo Krmpotic ndio anaanza kukisuka rasmi kikosi chake akisaidiana na Mwambusi ambaye kwa kiasi kikubwa aliweza kuiandaa timu iliyocheza vizuri sana mechi ya jana
Huyu Krmpotic ni muumini wa soka la kushambulia, kwa kikosi alichonacho hakika ashindwe mwenyewe kwani Yanga ya sasa imekamilika kila idara
Leo mabingwa hao wa kihistoria huenda wakamshuhudia mshambuliaji Yacouba Songne akitua kwenye ardhi ya Tanzania kuzidi kuiongezea Yanga makali
Songne aliondoka Burkina Faso jana na anatarajiwa kuwasili nchini siku ya leo
Krmpotic ana siku tano za kukiandaa kikosi chake kabla ya mchezo dhidi ya Tanzania Prisons siku ya Jumamosi, saa moja usiku
Huu utakuwa mchezo wa kwanza wa kufungua msimu mpya wa ligi kuu ya Vodacom
Pengine ndani ya wiki nne, Krmpotic atakuwa tayari ametengeneza kikosi imara kitakachokuwa na kazi moja tu, kugawa dozi kwa kila anayekuja mbele!
