Msimu mpya wa ligi kuu ya Vodacom (2020-21) unaanza mwishoni mwa wiki hii siku ya Jumapili kwa timu 18 kushuka viwanjani
Msimu huu idadi ya timu zimepungua kutoka 20 za msimu uliopita na sasa ni 18
Kila timu itacheza michezo 17 kila mzunguuko na kufanya idadi ya michezo yote kuwa 34
Huu ni msimu muhimu sana kwa mabingwa wa kihistoria Tanzania, klabu ya Yanga inayowania kuurejesha ubingwa Jangwani baada ya kuukosa kwa misimu mitatu
Kipaumbele msimu huu ni kutwaa ubingwa, hilo halina mjadala kutokana na usajili mkubwa uliofanywa na GSM
Kikosi kilichoundwa na GSM kina hadhi ya kimataifa kuanzia wachezaji mpaka kocha, hivyo msimu huu Yanga sio timu ya kuwania nafasi ya pili au ya tatu
Hesabu za ubingwa zitaanzia jijini Dar es salaam, mchezo wa kwanza utakuwa dhidi ya Tanzania Prisons siku ya Jumapili, Septemba 06 na utapigwa saa moja jioni uwanja wa Mkapa
Huu ni mchezo ambao Yanga inahitaji matokeo ya ushindi ili kuanza msimu vizuri, mwanzo mbaya unaweza kuvuruga utulivu unaonekana baada ya kikosi kuundwa upya
Pamoja na ukweli kuwa kocha Zlatko Krmpotic atahitaji muda kuunda kikosi chake cha ushindi, kwa kushirikiana na kocha Msaidizi Juma Mwambusi, atapaswa kuchanga karata zake vyema ili kuhakikisha mechi hii ya kwanza alama zote tatu zinapatikana
Aidha kupungua kwa timu kutampa muda wa kuimarisha kikosi chake wakati ligi ikiendelea kwani ni wazi siku za mapumziko kutoka mechi moja kwenda nyingine zitaongezeka
Baada ya mchezo huo, mechi itakayofuata ni dhidi ya Mbeya City nayo itapigwa uwanja wa Mkapa
