Uongozi wa klabu ya Yanga umewataka wapenzi, wanachama na mashabiki wake kuungana pamoja kuhakikisha timu inapata hamasa ya kutosha katika kila mchezo wa ligi watakaocheza
Baada ya ushindi wa bao 1-0 dhidi ya Kagera Sugar mwishoni mwa wiki, Jumapili ijayo Yanga inasafiri mkoani Morogoro kuifuata Mtibwa Sugar katika mchezo mwingine wa ugenini
Makamu Mwenyekiti wa Yanga Fredrick Mwakalebela amesema lengo la Yanga msimu huu ni kutwaa ubingwa hivyo kila mchezo kwao ni fainali
Amesema wamejipanga kuhakikisha Yanga inashinda popote pale iwe nyumbani au ugenini
"Kama viongozi tunatimiza wajibu wetu, tunahakikisha wachezaji na benchi la ufundi wanakuwa na mazingira mazuri ya maandalizi hivyo tunawataka mashabiki wetu wahakikishe timu inapata hamasa ya kutosha kila mahali wanapocheza. Tunachohitaji ni kushinda kila mchezo unaokuja mbele yetu tuweze kuwa mabingwa"
"Kocha ametuhakikishia kuwa kikosi kinaekea kukaa sawa kwa sababu kilichokuwa kinasumbua ni kupata kikosi cha kwanza, baada ya mechi na Kagera, ametuambia kuna mabadiliko makubwa.
"Tunaamini katika muda uliobaki kabla ya kukutana na Mtibwa Sugar atakuwa ameboresha zaidi na wachezaji wanaonekana wana morali nzuri kwa sababu mara nyingi tunakuwa nao kuwasapoti kambini," alisema Mwakalebela
