Wachezaji wa Yanga wamepania kuendeleza wimbi wa ushindi pale watakapochuana na Mtibwa Sugar kule mkoani Morogoro Jumapili
Nahodha Msaidizi wa mabingwa hao wa kihistoria Haruna Niyonzima, amesema malengo ya timu ni kuhakikisha wanashinda kila mchezo watakaocheza bila ya kujali wako nyumbani au ugenini
Yanga iliingia kambini jana mchana kujiandaa na mchezo huo watakaocheza Uwanja wa Jamhuri.
Timu hiyo iliyo chini ya kocha, Zlatko Krmpotic, itakwenda mkoani Morogoro katika mchezo wake wa pili ugenini baada ya awali kukipiga na Kagera Sugar, mjini Bukoba, Kagera na kutoka na ushindi wa bao 1-0.
Niyonzima amesema pamoja na kutambua ubora wa kikosi cha Mtibwa Sugar, lakini wanahitaji matokeo ili kuhakikisha wanatimiza malengo waliyoweka msimu huu
"Tunafahamu Mtibwa Sugar ni timu nzuri, mara nyingi wanapocheza uwanja wao wa nyumbani huwa sio wepesi, lakini tumejipanga"
"Tunahitaji kuvuna alama zote tatu bila ya kujali tunacheza na timu ipi au uwanja gani tunatumia, tutakwenda kupambana na kurejea nyumbani tukiwa na kile tunachohitaji," alisema.
Katika misimu miwili iliyopita Yanga ilishindwa kuondoka alama zote tatu katika mechi walizocheza na Mtibwa Sugar uwanja wa Jamhuri
Mwaka juzi walipoteza kwa kufungwa bao 1-0 na msimu uliopita wakatoka sare ya bao 1-1
Mchezo wa Jumapili unatarajiwa kuwa na ushindani mkali, utapigwa katika mazingira ya uwanja ambao mara nyingi umelalamikiwa kuwa sio rafiki
