Kesho Alhamisi, Oktoba 22 kikosi cha mabingwa wa kihistoria Tanzania, Yanga kitashuka dimba la Uhuru kumenyama na Polisi Tanzania katika mchezo wa ligi kuu ya Vodacom
Mchezo huo utakuwa wa kwanza kwa kocha mkuu wa timu hiyo ya Wananchi, Cedric Kaze
Akiwa amewaandaa vijana wake kwa takribani siku tano, Kaze amebainisha nini Wanayanga watarajie kutoka kwa timu yao
Kaze amesema atapenda kuona timu yake ikicheza soka la kasi ambalo litasababisha wapinzani wao wafanye makosa mengi ambayo wao watayatumkia kuwaadhibu
"Tutacheza soka la kasi kwa sababu hii itawafanya wapinzani kufanya makosa mengi ambayo yatakuwa faida kwetu," alisema
Aidha Mrundi huyo ameongeza kuwa timu anayoiunda yeye haitakuwa tegemezi, wachezaji wote watakuwa na majukumu sawa uwanjani
Kaze amesisitiza kuwa atawapa nafasi wachezaji walionyesha nidhamu nzuri mazoezini, kuzingatia maelekezo na kujituma
