Keshokutwa Jumapili Yanga itakuwa jijini Mwanza ambapo saa kumi Alasiri watashuka uwanja wa CCM Kirumba kumenyana na KMC katika mchezo wa ligi kuu ya Vodacom
KMC wamepeleka mchezo huo kule Mwanza, wakiamini watakuwa na nafasi ya kupata ushindi dhidi ya Yanga inayoendelea kuimarika chini ya kocha Cedric Kaze
Kuelekea mchezo huo, wachezaji wa Yanga wana deni kubwa kwa mashabiki wao ambao bado wana kumbukumbu ya matokeo ya msimu uliopita
Yanga iliambulia alama moja tu dhidi ya KMC. Msimu uliopita mchezo wa kwanza ukimalizika kwa matokeo ya sare ya bao 1-1 huku KMC wakishinda mchezo wa pili kwa bao 1-0
Hii ni mechi ya kisasi kwa Yanga tena inapigwa kwenye uwanja wa CCM Kirumba ambao kwa Yanga ni kama nyumbani tu
Yanga ina utajiri mkubwa wa mashabiki mkoani Mwanza, Wananchi watajitokeza kwa wingi kuwapa sapoti wachezaji wao
Lakini pia, huu ni msimu ambao hesabu za Yanga ziko kwenye ubingwa tu. Ushindi ndio matokeo ambayo Wananchi wanahitaji
KMC walianza msimu vizuri lakini wametetereka baada ya mechi tatu za mwanzo. Ni mchezo unaotarajiwa kuwa na upinzani mkali
