Mchezo wa kwanza wa watani wa jadi msimu huu ambao ulipigwa uwanja wa Benjamin Mkapa jioni ya leo Jumamosi, umemalizika kwa Yanga na Simba kugawana pointi baada ya kutoka sare ya bao 1-1
Yanga ilitangulia kupata bao la kuongoza kwenye dakika ya 31 likifungwa kwa mkwaju wa penati na Michael Sarpong
Ni baada ya mlinzi wa Simba Joash Onyango kumuangusha Tuisila Kidinda 'TK Master' ndani ya eneo la hatari
Yanga ilitengeneza nafasi kadhaa kwenye kipindi cha kwanza huku ikiwa imara kuwadhibiti Simba eneo la kiungo
Mwanzoni mwa kipindi cha pili nahodha Lamine Moro alishindwa kuendelea na mchezo baada ya kuumia na nafasi yake kuchukuliwa na Said Juma Makapu
Katika kipindi cha pili Simba walikuwa bora zaidi na walifanikiwa kusawazisha bao kwenye dakika ya 87 kupitia kwa Onyango ambaye aliunganisha kwa kichwa mpira wa kona uliopigwa na Mohammed Hussein
Ulikuwa ni mchezo uliotawaliwa na ufundi mwingi, matokeo hayo yanaifanya Yanga iwe mbele ya Simba tofauti ya alama nne
Mabingwa hao wa kihistoria wanaendelea kushikilia nafasi ya pili baada ya kufikisha alama 24, alama moja nyuma ya Azam Fc inayoongoza ligi ikiwa na alama 25
