Msako wa alama tatu unaendelea kesho Jumapili Novemba 22 pale uwanja wa Benjamin Mkapa wakati mabingwa wa kihistoria Yanga watakaposhuka dimbani kuikabili Namungo Fc katika mchezo wa ligi kuu ya Vodacom mzunguuko wa 12
Huu utakuwa mchezo wa tatu wa ligi kuzikutanisha Yanga na Namungo Fc, msimu uliopita timu hizo zikitoka sare katika michezo yote miwili
Ule uliopigwa jijini Dar es salaam ulimalizika kwa matokeo ya sare ya mabao 2-2, Yanga ikitokea nyuma kwa mabao mawili na kufanikiwa kupata alama moja, shukrani kwa mabao ya David Molinga 'Falcao'
Msimu huu timu hizo zinakutana zikiwa na mazingira tofauti. Yanga itashuka uwanjani ikiwa na morali kubwa tofauti na wapinzani wao, Namungo Fc
Wakiwa kwenye nafasi ya pili, Yanga ndio klabu pekee ambayo bado haijaonja uchungu wa kufungwa msimu huu
Wananchi wenyewe wanasema ndio klabu pekee katika ligi kubwa duniani ambayo haijapoteza mchezo
Baada ya mchezo huo, mchezo utakaofuata kwa Yanga ni dhidi ya Azam Fc. Hivyo ni wazi Wananchi wataingia katika mchezo huo wakiwa na hesabu moja tu, kuondoka na alama zote tatu ili waende Chamazi wakiwa na ari zaidi
Namungo Fc imekuwa na msimu wenye milima na mabonde. Mafanikio waliyopata msimu uliopita, hayaonekani msimu huu
Ni juzi tu wameachana na kocha wao Hitimana Thiery kisha wakamtangaza kocha Hemedi Morocco kumrithi Hitimana
Wanashika nafasi ya tisa wakiwa wamekusanya alama 14 kutoka michezo 10
Hautakuwa mchezo mwepesi lakini ni wazi, kwa Yanga hii ni mechi ambayo wana kila sababu ya kushinda
Wananchi wameaswa kujitokeza kwa wingi kushuhudia tiki-taka la Cedric Kaze ambapo viingilio Mzunguko 5,000/- , V.I.P B & C 10,000/-, V.I.P A 15,000/-, Royal 50,000/-
