Ni mwendo wa kukusanya alama tatu tatu! Ndivyo unavyoweza kusema kwa mwenendo walionao Yanga baada ya kuichapa Ruvu Shooting mabao 2-1 katika mchezo uliopigwa uwanja wa Benjamin Mkapa
Wale waliokuwa wakihoji uwezo wa Yanga ya Cedric Kaze bila shaka wameanza kupata majibu yao kwani kwa hakika Yanga imeanza kucheza vile ambavyo kila mmoja anapenda kuiona
Leo walinzi wa Ruvu Shooting wakongwe Juma Nyoso na Ponera wanaweza kulala na viatu kwani TK Master, Michael Sarpong na Yacouba Sogne waliwaweka katika wakati mgumu
Sarpong ndiye aliyetangulia kuifungia Yanga bao la kuongoza kwenye dakika ya 31 akimalizia mpira uliokuwa ukizagaa langoni kwa Ruvu Shooting
Bao hilo lilidumu mpaka wakati timu zinakwenda mapumziko
Baada ya ukosoaji mwingi kuwa Yanga 'inakata moto' katika kipindi cha pili, leo mambo yalikuwa tofauti kwani moto uliwawakia zaidi Ruvu Shooting kwenye kipindi cha pili
Presha ya Yanga walioiweka langoni kwa Ruvu Shooting mwanzoni mwa kipindi hicho, ilipelekea Wananchi kuzawadiwa mkwaju wa penati baada ya mlinzi wa Ruvu kuzuia kwa mkono shuti la Mukoko
Deus Kaseke alichukua jukumu la kupiga mkwaju huo lakini haikuwa bahati, hakufanikiwa kuuweka mpira kambani
Kwenye dakika ya 60, Ruvu wakarejea mchezoni kwa bao la Richard David aliyetumia makosa ya Mwamnyeto
Kuingia kwa bao hilo kuliiamsha Yanga ambayo ilikuwa ikilishambulia lango la Ruvu Shooting kama nyuki
Kama washambuliaji wa Yanga wakiongozwa na Sarpong, wangeongeza umakini, mabao yangekuwa mengi
Krosi ya Kisinda ambaye kwa hakika alikuwa nyota wa mchezo huo, iliwekwa kambani na mlinzi Ponera aliyejaribu kuokoa krosi hiyo matata huku akiwa katika presha kubwa kutoka kwa Sarpong
Ulikuwa mchezo ambao Yanga imedhihirisha sasa iko tayari kuwania ubingwa wa ligi kuu msimu huu
Wananchi wameendelea kugoma kufungwa sasa wakicheza mechi 14 za ligi mfululizo bila kufungwa!
Wamejikita kileleni wakijikusanyia alama 34. Mechi tatu zimebaki kukamilisha duru ya kwanza. Mechi hizo ni dhidi ya Mwadui Fc, Dodoma Jiji na Ihefu Fc
Mchezo dhidi ya Dodoma Jiji utapigwa Dar wakati michezo dhidi ya Mwadui na Ihefu inapigwa ugenini
