Wananchi wametakata uwanja wa Sheikh Amri Abeid wakiwafumua Dodoma Jiji mabao 3-1 katika mchezo mkali wa Ligi Kuu ya Vodacom uliopigwa jioni ya leo
Yanga ilikuwa nyuma baada ya dakika tatu Dodoma Jiji wakifunga bao la kuongoza kupitia kwa Seif Karihe aliyewahi mpira uliotemwa na mlinda lango Metacha Mnata katika shambulizi ambalo halikuonekana kuwa na hatari
Kuingia kwa bao hilo kuliwaamsha wananchi kuanza msako wa bao la kusawazisha
Iliwachukua dakika 27 tu Yanga kusawazisha bao hilo kupitia kwa nahodha Lamine Moro aliyemalizia vyema mpira wa adhabu uliopigwa na Deus Kaseke
Mpaka mapumziko ubao ulisomeka 1-1 pamoja na Yanga kumiliki mpira kwa kiasi kikubwa
Saido Ntibazonkiza, hili jina itabidi watangazaji na wachambuzi wa soka nchini walizoee kwani dakika zake 45 alizopewa na Cedric Kaze kwenye kipindi cha pili, zilitosha kuipa Yanga alama tatu muhimu
Alifunga bao la pili kupitia mpira wa adhabu na kutengeneza bao la tatu kupitia mpira wa adhabu ambao uliwekwa kambani na Bakari Nondo Mwamnyeto
Ulikuwa ni mchezo uliogubikwa na matukio mengi ya kibabe kutoka kwa wachezaji wa Dodoma Jiji, itoshe kusema mwamuzi hakuumudu
Muhimu ni matokeo ya ushindi kwa Yanga ambayo imeendelea kujikita kileleni mwa msimamo baada ya kufikisha alama 40
Kwa hakika huu moto hautazimika mpaka sherehe za ubingwa mwezi Mei....!
