Licha ya Tanzania Prisons kujinasibu kwamba itatibua rekodi ya Yanga ya kutopoteza mechi hadi sasa, Kocha Mkuu wa Yanga, Cedric Kaze, amesema matokeo ya kumaliza mzunguko wa kwanza kwa kuwa kileleni, yanawapa ari ya kuendeleza ushindi mzunguko wa pili
Yanga ambayo ipo kileleni mwa msimamo wa ligi hiyo ikiwa na pointi 43, imemaliza mechi 17 za mzunguko wa kwanza bila kupoteza, ikishinda 13 na kutoka sare michezo minne.
Hata hivyo, juzi Katibu Mkuu wa Prisons, Ajibu Kifukwe, alisema anakumbuka msimu uliopita Prisons ilikuwa ndiyo timu pekee ambayo haijapoteza mechi hata moja kwenye Ligi Kuu, lakini Yanga ndiyo ilitibua rekodi hiyo, kwa hiyo na wao wamejipanga kulipiza kisasi kwa kuwaharibia rekodi yao ya kutopoteza pia.
Lakini Kaze amesema, wachezaji wake watazidi kupambana ili kuwa bora kwenye mechi zao zijazo za mzunguko wa pili.
"Tuna kila sababu ya kushukuru kumaliza mzunguko wa kwanza tukiwa tunaongoza msimamo wa ligi, hii ni kutokana na wachezaji kujitoa na kujitambua kuhakikisha tunapata pointi tatu katika kila mchezo ambazo zimetufikisha hapa.
"Natumaini tutaanza tena vizuri mzunguko wa pili ili tuweze kufanikiwa kufanya vizuri na mwisho wa siku tutwae ubingwa wa ligi,” alisema Kaze.
Timu hizo zitashuka Dimba la Nelson Mandela mjini Sumbawanga keshokutwa, Alhamisi zikiwa na kumbukumbu ya kutoka sara ya bao 1-1 katika mchezo wa raundi ya kwanza uliopigwa Uwanja wa Benjamin Mkapa
