Juzi saa chache kabla ya dirisha dogo la usajili kufungwa, Yanga ilitambulisha usajili wa mshambuliaji Fiston Abdul Razak, nyota wa Kimataifa wa Burundi
Usajili wa Fiston ulikuwa wa tatu katika kipindi cha dirisha dogo la usajili, Yanga pia ikiwasajili Saido Ntibazonkiza na mlindi Dickson Job
Fiston alisubiriwa sana na mashabiki wa Yanga kutokana na uhitaji wa nafasi anayocheza
Baada ya mwamba huyo kutua, Kocha Mkuu wa Yanga Cedric Kaze amesema Wananchi watarajie kuona mambo mazuri kwani amemleta mtu ambaye atafanya majukumu mawili kwa ufasaha, kufunga na kutengeneza nafasi za mabao
Aidha Kaze amesema mchezaji huyo atakuja kuongeza chachu katika falsafa yake ya soka anayoijenga kwenye kikosi cha Yanga
"Fiston ni chaguo na mapendekezo yangu, kwa hiyo kuja kwake kumekuja kunogesha falsafa yangu ambayo najaribu kuitengeneza"
"Ni mchezaji anayejua kufunga na kutengeneza nafasi za mabao, namjua vizuri na amekuja kucheza kwenye kikosi cha kwanza, hivyo wapinzani wajiandae tu," alitamba Kaze
Wanayanga watarajie kumuona dimbani karibuni Yanga ikitarajiwa kucheza mechi za kirafiki wakati huu ambao ligi imesimama kupisha michuano ya CHAN iliyoanza jana nchini Cameroon
Michuano hiyo itamalizika Februari 07
