Mshambuliaji mpya wa Yanga Fiston Abdul Razak amesema atapambana kuhakikisha anafanya vizuri ndani ya kikosi cha mabingwa hao wa kihistoria katika ligi kuu ya Vodacom
Fiston alisajiliwa na Yanga juzi muda mfupi kabla ya dirisha dogo la usajili kufungwa akiwa mchezaji huru baada ya kumaliza mkataba kule Misri klabu ya ENPPI
Nyota huyo alisaini mkataba wa miezi sita ambapo kuna makubaliano ataongeza mwishoni mwa msimu kama mabosi wataridhishwa na uwezo wake
Moja ya changamoto inayowakabili nyota wengi wa kigeni wanaokuja kucheza Tanzania ni kushindwa kufanya vizuri katika ligi kuu ya Vodacom licha ya kufanya vizuri huko walikotoka
Fiston raia wa Burundi amesema kwa upande wake amejiandaa vizuri na ana hakika atawapa furaha mashabiki
"Zipo sababu ambazo zinaweza kupelekea mchezaji asifanye vizuri anapohama kutoka ligi moja kwenda nyingine. Kwanza ni maandalizi kwa mchezaji mwenyewe. Ni muhimu kwa mchezaji mwenyewe kujiandaa na kuwa tayari kwa ajili ya changamoto mpya"
"Lakini pia ni vile mchezaji mwenyewe alivyo. Wachezaji tuna tofautiana, kuna wengine wanazoea mazingira mapya kwa haraka lakini wengine wanahitaji muda kuzoea kabla ya kuanza kufanya vizuri"
"Pia suala la ushindani wa ligi linachangia. Kwa upande wangu naifahamu ligi ya Tanzania, nimejiandaa vizuri, nitahakikisha nawapa furaha mashabiki," alisema Fiston
Pamoja na kucheza nafasi ya ushambuliaji, Fiston maarufu 4G pia humudu kucheza nafasi zote za winga
Unaambiwa mwamba huyu ana kasi mithiri ya Tuisila Kisinda ndio maana wakampachika jina la 4G
Sisi vuta taswira, kwa Kisinda tu mabeki wanateseka vile itakuwaje akiongezeka na Fiston
