Mshambuliaji mpya wa Yanga Fiston Abdul Razak leo atakuwa na nafasi nyingine ya kuonyesha ubora wake wakati Wananchi watakaposhuka dimbani kuikabili Kagera Sugar katika mchezo wa ligi kuu ya Vodacom
Fiston ameitumikia Yanga katika michezo miwili , mmoja ukiwa na kirafiki dhidi ya African Sports na mchezo uliopita wa ligi kuu dhidi ya Mbeya City
Bado nyota huyo wa timu ya Taifa ya Burundi hajaonyesha makali yake lakini mashabiki wameweka matumaini makubwa kwake kwani ujio wake ulilenga kuboresha safu ya ushambuliaji
Kocha Mkuu wa Yanga Cedric Kaze amesema hana wasiwasi na uwezo wa Fiston, ni suala la muda tu ataanza kuonyesha kile kilichopelekea wamsajili
Fiston mwenyewe anaamini kwa ubora wa wachezaji wanaounda kikosi cha Yanga akishirikiana nao vema wanaweza kupata matokeo chanya kwa kufunga mabao wanapopata nafasi
"Kwa ujumla ushindani ni mkubwa na kila timu inahitaji kupata matokeo chanya ndani ya uwanja, bado tuna muda wa kufanya vizuri na mashabiki watafurahi," alisema
