Kitaeleweka tu pale Kaunda

Bado dhamira ya Yanga kuhakikisha inaanza kuutumia uwanja wake wa Kaunda kwa ajili ya mazoezi kuanzia mwakani iko palepale na zoezi la kujaza kifusi linaendelea licha ya changamoto ya mvua.

Aidha jana Katibu Mkuu wa Yanga charles Mkwasa alisema uungwaji mkono kutoka kwa wanachama na mashabiki wa Yanga umekuwa mkubwa ambapo michango kutoka makundi mbalimbali ya mitandao ya kijamii inaendelea kupokelewa.

Pia Mkwasa amewashukuru TANROADS kwa kusaidia kifusi cha kutosha kufanikisha ukarabati wa uwanja huku akibainisha kuwa Yanga inajipanga kukifikisha kifusi hicho Jangwani.

Aidha Mkwasa amedokeza kuwa alipata fursa ya kukutana na viongozi wanaosimamia eneo la Mto Msimbazi, waliosaidia kutanua mtaro ili kupunguza mafuriko Jangwani.

Mipango ya Yanga ni kuhakikisha uwanja huo unakuwa tayari kuanza kutumika kwa mazoezi ikiwezekana kuanzia mzunguuko wa pili wa ligi kuu ya Vodacom.

Zoezi la maboresha ya uwanja huo litaendelea ambapo Yanga imekusudia kujenga uwanja wa kisasa utakaoweza kuchukua mashabiki 20,000.

Yanga itautumia uwanja huo kwa ajili ya mazoezi, michezo ya kirafiki na michezo yake ya ligi.

Mkwasa amesema wanakusudia kuufanya uwanja huo uwe moja ya chanzo kikubwa cha mapato ya klabu.