Miongoni mwa masuala ambayo Mwenyekiti wa Yanga Dk Mshindo Msolla aliyatolea ufafanuzi wakati akizungumza na wanahabari jana, ni kuhusu tuhuma za kumpigia simu mlinda lango Metacha Mnata baada ya mchezo dhidi ya Polisi Tanzania uliomalizika kwa matokeo ya sare ya bao 1-1
Simu hiyo ndio inayodaiwa kumvuruga Metacha ambaye jana aliweka ujumbe wa kuwaaga mashabiki wa Yanga lakini baadae akaondoa ujumbe huo kwenye ukurasa wake wa mtandao wa kijamii
Dk Msolla amesema hakumpigia simu Metacha na hana kawaida ya kuwapigia simu wachezaji moja kwa moja
Amesema kilichotokea kuna watu wenye nia ovu walitumia namba yake kupiga simu mlinda lango huyo kakini si yeye
"Mimi sina kawaida ya kuwapigia simu wachezaji moja kwa moja. Kama kuna jambo napendelea kuzungumza na Mameneja wao. Jana baada ya kupewa taarifa ya ujumbe wa Metacha, nilimtafuta Meneja wake (Jemedari Said), sikuweza kumpata lakini leo nimezungumza nae kwa kirefu"
"Kimsingi mimi sikupiga simu hiyo, kuna watu walitumia namba yangu ya simu (walihack) wakapiga simu na kutoa tuhuma zao. Hata ukienda TCRA kufuatilia taarifa za mawasiliano ya namba yangu, hutaona kama mimi nimepiga simu kwa Metacha"
"Hizi ni vita, sijui aliyefanya jambo hili alikusudia nini lakini mimi sijawahi kuzungumza na mchezaji mmoja mmoja. Siku zote huwa naenda kambini na kama kuna jambo nitazungumza na wachezaji wote kama kundi," alisema Dk Msolla
Dk Msolla amesema atakutana na Metacha kuzungumza nae kuhusu suala hilo kuwa hahusiki kwa namna yoyote
Ni wazi lipo kundi la watu linafanya jitihada kuhakikisha wanaivuruga Yanga na kama Wanayanga wasipokuwa makini, lengo lao litafanikiwa
