Meneja wa Habari na Mawasiliano klabu ya Simba Ahmed Ally amewataka Wanachama na mashabiki wa timu hiyo kununua tiketi kwa wingi ili kuhakikisha wanaujaza uwanja wa Benjamin Mkapa siku ya Jumamosi katika mchezo wa ligi ya mabingwa dhidi ya Raja Casablanca
Ahmed amesema wako tayari na wamejipanga kwelikweli kuendeleza moto waliutumia kuwaunguza vigogo wengine wa Afrika katika uwanja wa Benjamin Mkapa
Ahmed amesema huo utakuwa mchezo zaidi ya kawaida kwa Wanasimba na dhamira yao ni kushinda
Aidha bosi huyo wa kitengo cha Habari amethibitisha kuwa mchezo huo utapigwa saa 1 usiku kulingana na ratiba iliyotolewa na CAF licha ya kuwa Simba iliomba mchezo huo upigwe saa 10 jioni
"Huo ni zaidi ya mchezo wa kawaida ambao mwanadamu amewahi kuona au kufikiria. Sisi kama Simba tunataka jambo moja tu, ni ushindi mbele ya Raja Ac"
"Kwa mujibu wa CAF, mchezo ni saa 1:00 usiku, awali tulithibitisha kucheza saa 10:00 jioni lakini ratiba ya mwisho kutolewa na CAF imekuwa saa 1:00 usiku. Tumewaandikia CAF kuwaomba muda wa mchezo uwe saa 10:00 jioni."
"Naomba kuwambia mashabiki wa Simba tuanze kujiandaa na muda wa saa 1:00 usiku. Lakini sisi hatuangalii muda, muda wowote tupo tayari kupambana ili kupata ushindi. Na kama mnakumbuka tulishawahi kucheza saa 4 usiku na tukapata matokeo," alisema Ahmed
Kuhusu hali za wachezaji, Ahmed amesema Sadio Kanoute atakosekana katika mchezo huo kwa kuwa anatumikia adhabu ya kadi tatu za njano
"Kuhusu Sadio Kanoute hatakuwepo kwenye mchezo unaokuja kutokana na kuwa na kadi tatu za njano. Kuhusu Saidi Ntibazonkiza sasa ameshapona, mwingine ni Peter Banda"
Ahmed ametangaza rasmi kufanyika kwa uzinduzi wa Hamasa kuelekea mchezo huo. Amebainisha kuwa uzinduzi utafanyika saa 5 asubuhi huko Tegeta
"Simba tunapoingia kwenye mechi hizi za kimataifa tunakuwa tumeingia kwenye msimu wa sherehe. Kesho Jumatano kuanzia majira ya saa 5 asubuhi tutafanya uzinduzi mkubwa kwenye tawi la Home Boys lililopo Tegeta:
"Tunakwenda kwenye mechi kubwa tukijiamini maana tunaamini tunachokwenda kukifanya kwenye michuano hii. Ili tuweze kupata matokeo Jumamosi basi mashabiki wa Simba 60,000 tuwaone pale Kwa Mkapa. Wakijaa mashabiki wa Simba hakuna timu Afrika hii inaweza kutoka salama. Tayari tumeanza kuuza tiketi, nunua tiketi yako mapema"
