Kocha Mkuu wa KMC, Mrundi Thierry Hitimana, amelia na waamuzi waliochezesha mechi yao juzi dhidi ya Azam FC, wakiongozwa na refa wa kati Isihaka Mwalile, kwa kushindwa kuwapa penalti mbili za wazi ambazo walistahili
Hitimana ambaye timu yake ilifungwa bao 1-0 kwenye Uwanja wa Azam Complex, lililozamishwa kambani na Idd Nado, alisema waamuzi hawakuitendea haki timu yao kiasi hata baadhi ya wachezaji wa Azam walionekana kuwaonea huruma.
"Hatukufeli kwenye mechi hii, tumecheza vizuri, kuna vitu vingine tunalalamika, lakini tunaonekana kama vile walalamishi, unajua ukiwa timu ndogo ni matatizo sana, hatukutendewa haki, kuna penalti mbili za wazi ilibidi tupewe, lakini ziliachwa tu, hata baadhi ya wachezaji wa Azam FC ambao ni mabeki waliosababisha, pambano lilipomalizika walinifuata kunipa pole, wakaniambia kocha pole sana zile zilikuwa penalti kabisa, wamewadhulumu tu"
"Basi tunakubali, nawapongeza wachezaji wangu, tulicheza mechi ngumu mbili kwa muda mfupi tena na timu zilizopo juu, tulicheza na Yanga, halafu hii na Azam, nadhani mechi zilizobaki tutapambana ili tusishuke kwenye msimamo wa ligi zaidi ya hapa tulipo," alisema Hitimana
