Simba inakwenda robo fainali ya michuano ya ligi ya mabingwa barani Afrika kibabe kabisa kwa ushindi wa mabao 7-0 dhidi ya Horoya Ac katika mchezo uliopigwa uwanja wa Benjamin Mkapa
Hizi ni salamu kwa vigogo wote Afrika kuwa Simba iko tayari kushindania ubingwa msimu huu
Mnyama alianza kampeni yake taratibu kwa kupoteza mechi mbili za kwanza lakini leo anakwenda robo fainali kwa ushindi mkubwa zaidi katika michuano hiyo msimu huu
Ilikuwa siku nzuri kwa Clatous Chama 'Mwamba wa Lusaka' ambaye leo ameondoka na mpira akifunga mabao matatu
Sadio Kanoute leo amewaonyesha kuwa yeye sio kukata umeme tu, hata kufunga anaweza, akiweka kambani mabao mawili yote akimtungua mlinda lango kutoka nje ya 18
Jean Baleke katika ubora mkubwa kabisa akaweka kambani mabao mawili pia sasa akifunga mabao matano katika mechi mbili
Ilikuwa mechi ya upande mmoja, Simba walitawala na pengine Horoya Ac wangeondoka na nyingi zaidi
Kwa hakika Simba sasa iko tayari kutimiza malengo yake ya angalau kucheza nusu fainali ya michuano hiyo msimu huu
