Kaimu Kocha Mkuu wa timu ya Taifa ya Tanzania 'Taifa Stars' Hemed Morocco amesema wanafahamu mchezo dhidi ya Guinea kesho utaamua hatma yao kama wanafuzu kwa michuano ya Afcon 2025 au la
Morocco amesema wachezaji wote wako tayari kwa mchezo huo na wamejipanga kuhakikisha wanaibuka na ushindi
"Tumerejea salama kutoka Ethiopia, tumepata muda mzuri wa recovery na leo tutaendelea na mazoezi yetu ya mwisho katika uwanja wa Benjamin Mkapa"
"Jambo linalotupa nguvu ni kwamba wachezaji wote wako katika afya njema kimwili na kiakili. Hii ni mechi ya mwisho ya kuamua hatma yetu, niseme tunalijua hilo"
"Tutapambana kadiri ya uwezo wetu ili kuhakikisha tunapata matokeo muhimu tunayohitaji. Niwaambie Watanzania tuko vizuri pengine kuliko wakati mwingine wowote"
"Wachezaji na sisi tunajua umuhimu wa mchezo huu, hatuna presha kwani naamini tutapata matokeo mazuri," alisema Morocco
Morocco amesema Tanzania haijawahi kuwa na njia rahisi katika kufuzu michuano ya Afcon na mara nyingi wanakata tiketi katika mechi ya mwisho
Hivyo ameiandaa timu kwa kuzingatia mahitaji ya mchezo huo kwani anafahamu ni ushindi pekee ambao utawafanya wafuzu
Mchezo huo utapigwa kuanzia saa 10 jioni na hautakuwa na kiingilio baada ya Rais wa Jamhuri ya Muungano wa Tanzania Mh Dk. Samia Suluhu Hassan kutoa ofa kwa mashabiki kushuhudia mchezo huo bure
