Klabu ya Simba SC imeendelea kuonyesha dhamira yake ya kukisuka upya kikosi chake kwa kufanya usajili muhimu, ikikamilisha dili la kumsajili kiungo mshambuliaji Inno Jospin Loemba pamoja na winga mahiri Anicet Oura.
Wekundu wa Msimbazi wanatajwa kukamilisha usajili wa Loemba mwenye umri wa miaka 21 kutoka klabu ya Colombe Sports ya Cameroon. Loemba, raia wa Congo Brazzaville, anatua Simba kama sehemu ya mpango wa kuimarisha safu ya ushambuliaji baada ya mwanzo wa kusuasua msimu huu.
Loemba alikuwa nahodha wa kikosi cha Colombe Sports licha ya umri wake mdogo, jambo linaloonyesha uwezo wake mkubwa na sifa za uongozi. Ujio wake unafuatia urejeo wa kiungo mwenye uzoefu mkubwa Clatous Chama, hatua inayodhihirisha dhamira ya Simba kuongeza ubunifu na nguvu katika eneo la kiungo cha ushambuliaji.
Sambamba na hilo, Simba pia imefanikiwa kumpata winga Anicet Oura ambaye amejiunga na klabu hiyo kama mchezaji huru baada ya kumaliza mkataba wake na klabu ya IF Gnistan ya Finland. Oura ni raia wa Ivory Coast mwenye umri wa miaka 26 na ana uwezo wa kucheza pande zote za winga pamoja na nafasi ya kiungo mshambuliaji namba 10.
Usajili wa Oura ni pendekezo la kocha mkuu Steve Barker, ambaye aliwahi kufanya kazi na mchezaji huyo katika klabu ya Stellenbosch ya Afrika Kusini. Katika msimu wa 2023/24 akiwa Stellenbosch, Oura alifunga mabao nane katika michezo 35 aliyocheza kwenye mashindano yote kabla ya kuelekea Finland.
Dirisha la usajili likitarajiwa kufungwa Januari 30, Simba imeweka wazi kuwa haina mzaha katika kukiboresha kikosi chake. Wachezaji kadhaa wa kigeni ambao hawakufikia matarajio wameondolewa, na nafasi zao zimechukuliwa na nyota wapya wanaotarajiwa kuleta ushindani, ubora na nguvu mpya ndani ya kikosi.
Usajili wa Inno Loemba na Anicet Oura ni ishara tosha ya azma ya Simba kurejea kwenye ubora wake na kupambana kikamilifu katika mashindano ya ndani na yale ya kimataifa.
