Alhamisi, Machi 26, 2026; Dirisha la usajili linaendelea kupasha moto soka la Ulaya huku taarifa mbalimbali zikieleza mipango ya klabu kubwa kujipanga kwa msimu ujao. Hizi hapa ni tetesi kuu zinazozungumzwa leo.
Al-Ittihad wafufua mpango wa kumsajili Mohamed Salah
Klabu ya Saudi Pro League, Al-Ittihad, imefufua nia yake ya kumtaka mshambuliaji wa Liverpool, Mohamed Salah.
Al-Ittihad waliwahi kukataliwa ofa ya pauni milioni 150 mwaka 2023, lakini sasa wanarejea tena wakilenga kumsajili nyota huyo wa Misri mwenye miaka 33 bure, endapo ataondoka Liverpool mwishoni mwa msimu huu wa kiangazi.
Ripoti zinaeleza kuwa Salah hakupokea ofa nyingi kama ilivyotarajiwa Januari, hali iliyofanya mmiliki wa Liverpool, Fenway Sports Group, kuona ni busara kutoendeleza mvutano wa kimkataba.
Xabi Alonso aingia kwenye rada ya Liverpool
Wakati huo huo, Liverpool wamekuwa katika mawasiliano na kocha wa zamani wa Real Madrid, Xabi Alonso.
Inaelezwa kuwa Mhispania huyo yuko tayari kuchukua nafasi ya Arne Slot msimu ujao, ikiwa makubaliano ya kimkataba yatafikiwa.
Michael Olise bado ni chaguo, Bayern hawana haraka
Liverpool pia wamehusishwa na winga wa Ufaransa Michael Olise kama mbadala wa Salah. Hata hivyo, Bayern Munich hawana mpango wa haraka wa kumuuza mchezaji huyo mwenye miaka 24, ambaye bado ana mkataba hadi 2029.
Manchester United waanza kupanga kikosi cha Ulaya
Manchester United wanaripotiwa kuwafuatilia kwa karibu wachezaji kadhaa vijana, akiwemo winga wa RB Leipzig, Yan Diomande (19), pamoja na beki wa Newcastle United, Lewis Hall (21).
Pia, macho yao yapo kwa mshambuliaji wa Everton, Iliman Ndiaye (26), wakijiandaa kurejea kwenye mashindano ya Ulaya.
Mustakabali wa Casemiro na Rashford waendelea kuwa gumzo
Kiungo wa United, Casemiro, anatarajiwa kuondoka klabuni hapo mwishoni mwa msimu huu baada ya kuondoa kipengele cha kuongeza mkataba wake.
Wakati huohuo, mshambuliaji Marcus Rashford anaweza kuuzwa iwapo Barcelona hawatageuza uhamisho wake wa mkopo kuwa wa kudumu kwa pauni milioni 26.
Bastoni avutia vigogo wa Ulaya
Barcelona wanamwania beki wa Inter Milan, Alessandro Bastoni, lakini Liverpool nao wanafuatilia kwa karibu hali ya mchezaji huyo mwenye miaka 26.
Newcastle yaendelea kumuamini Eddie Howe
Licha ya presha kutoka kwa mashabiki, Newcastle United wanaendelea kumuunga mkono kocha wao Eddie Howe kufuatia matokeo yasiyoridhisha, ikiwemo kutolewa kwenye Ligi ya Mabingwa.
Vinicius Jr na Caicedo wazima uvumi wa kuondoka
Winga wa Real Madrid, Vinicius Junior, amesema anataka kubaki klabuni hapo kwa muda mrefu, huku akitarajiwa kusaini mkataba mpya.
Kwa upande mwingine, kiungo wa Chelsea, Moises Caicedo, amesisitiza kuwa hana mpango wa kuondoka licha ya kuhusishwa na Real Madrid.
Juventus yamsogelea Vlahovic
Juventus wako karibu kufikia makubaliano ya mkataba mpya na mshambuliaji wao Dusan Vlahovic, ambaye mkataba wake wa sasa unaelekea ukingoni.
