Mabingwa watetezi wa Ligi Kuu Tanzania Bara, Yanga, wamejiimarisha kileleni mwa msimamo wa ligi baada ya kuibuka na ushindi wa mabao 3-0 dhidi ya Tanzania Prisons katika mchezo uliopigwa Uwanja wa KMC Complex.
Ushindi huo unaifanya Yanga kufikisha alama 41, huku ukiwa ni muhimu baada ya kukaa kwa dakika 270 bila kupata ushindi.
Katika mchezo huo, Yanga ilianza kwa kasi na kutawala kwa kiasi kikubwa kipindi cha kwanza, lakini safu ya ulinzi ya Tanzania Prisons ilionyesha uimara na kufanikiwa kuhimili mashambulizi ya wapinzani wao hadi mapumziko yalipofika huku matokeo yakiwa 0-0.
Kipindi cha pili kilianza kwa mabadiliko ya kimkakati kutoka kwa Yanga, wakianza kutumia zaidi mashambulizi ya pembeni hali iliyowazaa matunda mapema.
Dakika ya 50, kiungo mshambuliaji Allan Okello aliipatia Yanga bao la kuongoza akimalizia krosi ya Israel Mwenda.
Bao hilo lilifungua mchezo zaidi huku Tanzania Prisons wakilazimika kusogea mbele kutafuta bao la kusawazisha, lakini hali hiyo iliwaacha wazi nyuma.
Dakika ya 68, Mudathir Yahya aliongeza bao la pili akimalizia pasi safi kutoka kwa Okello, akiendeleza presha kwa wapinzani wao.
Yanga iliendelea kutawala mchezo huo na kufanikiwa kupata bao la tatu dakika ya 86 kupitia Pacome Zouzoua, aliyemzunguka kipa wa Prisons, Moussa Mbissa, baada ya kupokea pasi mpenyezo kutoka kwa Duke Abuya.
Awali, Zouzoua alifunga bao lililokataliwa kwa madai ya kuotea, lakini hakukata tamaa na kufanikiwa kufunga bao halali lililohitimisha ushindi huo.
Kwa matokeo hayo, Yanga inaendelea kuonyesha dhamira ya kutetea ubingwa wake, huku Tanzania Prisons ikiendelea kusalia kwenye wakati mgumu katika msimamo wa ligi.
Ushindi huo pia unaongeza morali kwa kikosi cha Yanga kuelekea michezo ijayo ya ligi.
