Klabu ya Yanga imeeleza dhamira ya kuchukua hatua dhidi ya baadhi ya wachambuzi wa soka wanaodaiwa kuandika au kuzungumza habari zenye lengo la kuichafua klabu hiyo, hasa kuhusu tuhuma za upangaji wa matokeo.
Kwa mujibu wa Meneja wa Habari na Mawasiliano wa Yanga, Ali Kamwe, uongozi wa klabu hiyo tayari umeanza kushughulikia suala hilo na utawajulisha wanachama hatua zitakazochukuliwa mara zitakapokamilika.
Amesema wazi kuwa klabu haitakaa kimya mbele ya kauli au maandiko yanayodaiwa kupotosha jamii na kuharibu taswira ya mabingwa hao wa soka Tanzania Bara.
Mjadala wa tuhuma za “kununua mechi”
Baada ya Yanga kuonyesha ubora mkubwa uwanjani na kuanza kupata ushindi wa mabao mengi dhidi ya wapinzani wao, kumekuwa na mjadala mkubwa mitandaoni na kwenye baadhi ya vyombo vya habari.
Baadhi ya wachambuzi wameibua tuhuma zisizo rasmi wakidai kuwa ushindi wa Yanga huenda unaambatana na “kununua mechi” , madai ambayo yameibua mijadala mikali mitandaoni.
Hali hiyo imechochewa zaidi na ushindi wa mabao 6-0 dhidi ya Mbeya City, katika mchezo wa Ligi Kuu uliochezwa uwanja wa KMC Complex, tukio ambalo limeendelea kuzungumzwa sana kwenye mitandao ya kijamii.
Hata hivyo, mpaka sasa hakuna ushahidi rasmi uliowekwa wazi kuthibitisha tuhuma hizo, jambo linalofanya mjadala huo kubaki kama propaganda zenye lengo la kuichafua klabu ya Yanga.
Yanga kupeleka suala mamlaka za soka
Uongozi wa Yanga umeenda mbali zaidi kwa kueleza kuwa unalifuatilia suala hilo na huenda ukawafikisha baadhi ya wachambuzi mbele ya mamlaka za soka ili kutoa ushahidi wa madai yao.
Hatua hiyo inalenga, kwa mujibu wa klabu, kulinda heshima ya timu na kuhakikisha taarifa zinazotolewa kwa umma zinakuwa za ukweli na zenye ushahidi.
Suala la Seleman Mwalimu na Wydad AC
Katika hatua nyingine, Ali Kamwe amekanusha kuwepo kwa mazungumzo yoyote kati ya Yanga, mchezaji Seleman Mwalimu au klabu ya Wydad AC.
Ameongeza kuwa klabu inashauri mawakala na wachambuzi kutumia njia sahihi na za kitaalamu pindi wanapotafuta mikataba ya wachezaji, badala ya kuhusisha jina la Yanga kwenye mijadala isiyo rasmi.
Pia amebainisha kuwa taarifa zinazoendelea kumhusisha Mwalimu ni za uvumi, hasa baada ya mchezaji huyo kuonekana akihudhuria mchezo wa Yanga dhidi ya Mbeya City uwanjani KMC Complex.
