Leicester City imeandika historia ya kusikitisha baada ya kuthibitishwa kushuka hadi Ligi One (daraja la tatu England), kufuatia sare ya mabao 2-2 dhidi ya Hull City. Kushuka huko kumekuja rasmi Aprili 2026 na kunahitimisha msimu mbaya uliogubikwa na matokeo duni na changamoto za kifedha.
Hii ni anguko kubwa kwa klabu hiyo ambayo miaka 10 tu iliyopita ilifanya maajabu kwa kutwaa ubingwa wa Ligi Kuu England mwaka 2016. Sasa, kutoka kilele cha soka la dunia, Leicester wamejikuta wakishuka hadi daraja la tatu, moja ya vipindi vibaya zaidi katika historia yao.
Sababu kubwa iliyochangia kuporomoka kwao ni pamoja na mwenendo mbaya uwanjani, ambapo walishinda mechi chache sana msimu huu, pamoja na adhabu ya kupokwa alama sita kutokana na kukiuka sheria za matumizi ya fedha (Financial Fair Play).
Katika msimamo wa Championship, Leicester walikuwa katika nafasi za chini kabisa na walihitaji ushindi ili kujiweka salama, lakini sare dhidi ya Hull City ilifunga rasmi hatima yao ya kushuka.
Kocha Gary Rowett, ambaye alichukua mikoba katikati ya msimu, alishindwa kuzuia anguko hilo huku timu ikionyesha udhaifu mkubwa hasa katika safu ya ulinzi.
Mbali na uwanjani, mashabiki walionyesha hasira kubwa kufuatia matokeo hayo, wakilaumu uongozi na wachezaji kwa msimu mbaya uliosababisha kushuka kwa timu hiyo kwa mara ya pili mfululizo.
Kwa kushuka huku, Leicester sasa wataanza maisha mapya katika Ligi One, wakikutana na timu ambazo awali walikuwa mbali nazo kwa kiwango. Pia, kushuka huko kunatarajiwa kuathiri mapato ya klabu kwa kiasi kikubwa na kusababisha wachezaji muhimu kuondoka.
Swali kubwa sasa ni: Je, Leicester City wataweza kujijenga upya na kurejea kwenye ubora wao wa zamani, au hii ndiyo mwanzo wa safari ndefu ya kuporomoka?
