Shirikisho la Soka Brazil (CBF) limeweka wazi kikosi cha awali cha wachezaji 55 kitakachotumika kujiandaa na Kombe la Dunia 2026, huku majina makubwa ya Neymar Jr na Thiago Silva yakirejea rasmi kwenye mipango ya Seleção.
Kocha wa Brazil, Carlo Ancelotti, amewajumuisha mastaa hao wawili katika kikosi hicho cha muda kuelekea michuano ya Kombe la Dunia itakayofanyika Marekani, Canada na Mexico mwaka 2026.
Kurejea kwa Neymar kumekuwa gumzo kubwa kutokana na historia yake ya majeraha yaliyomuweka nje kwa muda mrefu tangu mwaka 2023.
Nyota huyo wa Santos bado anaendelea kupambana kurejea kwenye kiwango chake bora, lakini Ancelotti amesema maamuzi ya mwisho kuhusu nafasi yake yatategemea kiwango chake cha uchezaji na utimamu wa mwili, si historia yake pekee.
Katika mahojiano na Reuters, Ancelotti alieleza kuwa Neymar ameonyesha maendeleo makubwa ya kiafya katika wiki za karibuni na ameanza kucheza kwa kiwango kizuri zaidi akiwa Santos. Hata hivyo, kocha huyo amesisitiza kuwa hakuna nafasi ya hisia katika uteuzi wa mwisho wa kikosi cha Brazil.
Kwa upande mwingine, Thiago Silva mwenye umri wa miaka 41 ameendelea kupewa nafasi kutokana na uzoefu wake mkubwa ndani ya timu ya taifa. Beki huyo mkongwe ambaye aliwahi kuwa nahodha wa Brazil katika michuano kadhaa mikubwa bado anaonekana kuwa sehemu muhimu ya mpango wa Ancelotti kuelekea mashindano hayo.
Kikosi hicho cha awali kitapunguzwa hadi wachezaji 26 watakaokwenda moja kwa moja kwenye Kombe la Dunia. Majina ya mwisho yanatarajiwa kutangazwa rasmi kabla ya tarehe ya mwisho iliyowekwa na FIFA mwezi Juni mwaka huu.
Wakati huo huo, mastaa wengine waliopo kwenye kikosi hicho ni pamoja na Vinicius Junior, Rodrygo, Casemiro pamoja na Marquinhos huku baadhi ya vijana chipukizi wakikosa nafasi kutokana na majeraha na ushindani mkubwa ndani ya timu hiyo.
