Bruno Fernandes ametangazwa rasmi kuwa Mchezaji Bora wa Premier League kwa msimu wa 2025/26 baada ya msimu wa kiwango cha juu uliomfanya kuwa moyo wa Manchester United. Nahodha huyo wa United amepewa tuzo ya EA Sports FC Player of the Season kufuatia mchango mkubwa alioutoa katika kampeni iliyowarudisha United kwenye UEFA Champions League.
Bruno anakamilisha msimu akiwa mpaka sasa amecheza mechi 34 za ligi, akifunga mabao 8 na kutoa asisti 20, idadi iliyoweka rekodi mpya katika historia ya Premier League. Jumla ya michango yake 28 ya magoli imekuwa sehemu muhimu ya mafanikio ya United msimu huu, hasa katika kipindi ambacho timu ilipitia changamoto nyingi ndani na nje ya uwanja.
Mbali na asisti hizo za kihistoria, Bruno ametawala karibu kila takwimu muhimu ya ubunifu katika ligi. Ameongoza kwa expected assists nyingi zaidi, nafasi nyingi zilizotengenezwa, big chances nyingi zilizoundwa, pamoja na pasi nyingi sahihi ndani ya eneo la hatari. Kwa kifupi, karibu kila eneo la ubunifu wa mashambulizi lilikuwa chini ya jina lake msimu huu.
Kilichofanya msimu wake kuwa wa kipekee zaidi ni ukweli kwamba alifanya yote hayo wakati United wakipitia msimu wenye presha kubwa. Kulikuwa na mabadiliko ya kocha, matokeo yaliyotikisa timu mara kadhaa, na kipindi ambacho mashabiki walikuwa na mashaka kuhusu mustakabali wa klabu. Lakini Bruno aliendelea kuwa nguzo ya timu, akiongoza kwa kiwango na mfano wa uwanjani.
Katika umri wa miaka 31, wengi walikuwa wanaanza kuhoji kama bado ana uwezo wa kucheza katika kiwango chake cha juu. Badala ya kupungua, ameonekana kuwa bora zaidi. Rekodi ya asisti 20 imeweka jina lake mbele ya majina makubwa yaliyowahi kucheza Premier League kama Thierry Henry, Kevin De Bruyne na Cesc Fàbregas, Huku yeye akiwa amebakisha mchezo mmoja dhidi ya Brighton.
Kwa Manchester United, msimu huu utaendelea kukumbukwa kama msimu wa kurejea kwenye ushindani wa juu, na jina la Bruno Fernandes litabaki katikati ya hadithi hiyo. Kutoka kuwa nahodha mwenye kupingwa hadi kuwa mchezaji bora wa ligi nzima, Bruno amethibitisha kuwa bado ni mmoja wa viungo bora zaidi duniani.
