Mashabiki wa Arsenal walijitokeza kwa maelfu katika mitaa ya Kaskazini mwa London kusherehekea ubingwa wa Premier League, saa chache baada ya timu yao kupoteza fainali ya UEFA Champions League dhidi ya Paris Saint-Germain kwa mikwaju ya penalti.
The Gunners walimaliza ukame wa miaka 22 bila kutwaa taji la ligi kuu ya England, mafanikio ambayo yalitosha kuifanya klabu hiyo kuandaa gwaride kubwa la ubingwa tarehe 31 Mei 2026. Hata hivyo, shangwe hizo zilichanganyika na majonzi kufuatia kipigo cha penalti walichopata dhidi ya PSG mjini Budapest usiku uliotangulia.
Katika fainali hiyo, Arsenal waliongoza mapema kupitia Kai Havertz kabla ya PSG kusawazisha kupitia penalti ya Ousmane Dembélé. Baada ya dakika 120 kumalizika kwa sare ya 1-1, PSG walishinda kwa mikwaju ya penalti na kuinyima Arsenal ndoto ya kutwaa taji lao la kwanza la Champions League.
Licha ya maumivu ya kupoteza fainali hiyo, kikosi cha kocha Mikel Arteta kilirejea London kushiriki parade ya ubingwa wa Premier League, huku mamia ya maelfu ya mashabiki wakijaza barabara za Islington kushuhudia timu hiyo ikisherehekea mafanikio ya kihistoria ya ligi.
Arteta alisema baada ya fainali kuwa maumivu ya kushindwa yanapaswa kuwa chachu ya mafanikio makubwa zaidi siku zijazo. Nahodha Martin Ădegaard pamoja na kiungo Declan Rice walisisitiza kuwa timu imeonyesha maendeleo makubwa msimu huu licha ya kukosa ubingwa wa Ulaya.
