Atlético Madrid imeendelea kusimama kidete kuhusu mustakabali wa mshambuliaji wake nyota Julián Álvarez, huku klabu hiyo ikiripotiwa kuweka masharti magumu kwa FC Barcelona inayotaka kumsajili mchezaji huyo wa kimataifa wa Argentina.
Kwa mujibu wa taarifa, Atlético Madrid imesisitiza kuwa haitamwachia Álvarez kirahisi, huku ikimtaja kama mchezaji muhimu katika mipango ya muda mrefu ya klabu hiyo. Inasemekana kuwa uongozi wa Atlético unahitaji ofa ya takriban euro milioni 150 ili hata kufikiria kumuuza mshambuliaji huyo.
Barcelona, ambao wamekuwa wakitafuta kuimarisha safu yao ya ushambuliaji kuelekea msimu ujao, wanaripotiwa kumweka Álvarez kama moja ya malengo yao makuu ya usajili. Hata hivyo, changamoto kubwa inabaki kuwa bei iliyowekwa na Atlético, ambayo inaonekana kuzidi uwezo wa kifedha wa klabu hiyo kwa sasa.
Ripoti zinaongeza kuwa Barcelona tayari wameonyesha nia ya kutoa ofa ya karibu euro milioni 100, lakini Atlético Madrid imekataa pendekezo hilo, ikisisitiza kuwa mchezaji huyo “si wa kuuzwa” isipokuwa masharti yao yatimizwe kikamilifu.
Wakati huo huo, mvutano kati ya klabu hizo mbili umeendelea kuongezeka, huku Atlético Madrid ikionyesha kukerwa na uvumi unaoendelea kuhusu uhamisho huo, ambao imeuita kuwa wa kupotosha na usio na ukweli.
Kwa upande wake, Álvarez anaendelea kuwa mmoja wa wachezaji muhimu katika kikosi cha Atlético Madrid, akiwa na mchango mkubwa katika mashindano ya ndani na ya Ulaya, jambo linalozidi kuifanya klabu hiyo kushikilia msimamo wake mgumu.
Hatima ya usajili huo sasa inategemea iwapo Barcelona itaongeza dau lao au kuachana kabisa na mpango huo.
Alvarez kwa sasa yuko na kikosi cha timu ya Taifa ya Argentina ambayo iko Marekani kutetea ubingwa wa michuano ya kombe la Dunia.
