Michuano ya Kombe la Dunia 2026 imeendelea kwa matokeo ya kushangaza huku sare zikilitawala kundi G na H baada ya mechi zote za makundi hayo kumalizika bila mshindi kupatikana.
Katika kundi G, Ubelgiji na Misri zilitoka sare ya mabao 1-1 katika mchezo mkali uliochezwa Seattle. Misri ndiyo iliyokuwa ya kwanza kupata bao kupitia Emam Ashour dakika ya 19 baada ya pasi ya nahodha Mohamed Salah. Hata hivyo, Ubelgiji ilisawazisha kipindi cha pili kupitia bao la kujifunga la beki Mohamed Hany baada ya shinikizo lililosababishwa na mshambuliaji Romelu Lukaku aliyeingia akitokea benchi.
Misri ilikuwa karibu kuandika historia ya kupata ushindi wake wa kwanza kabisa katika fainali za Kombe la Dunia, lakini bao hilo la kujifunga liliinyima furaha hiyo. Ubelgiji nayo ilikosa nafasi kadhaa za wazi, huku Kevin De Bruyne akigonga mwamba wa goli na Lukaku kukosa nafasi nzuri mwishoni mwa mchezo.
Mchezo mwingine wa kundi G kati ya Iran na New Zealand pia ulimalizika kwa sare ya mabao 2-2, jambo lililofanya timu zote nne za kundi hilo kuwa na pointi moja baada ya mechi zao za ufunguzi.
Katika kundi H, mabingwa wa Ulaya Uhispania walikwama mbele ya Cape Verde kwa sare tasa ya 0-0. Cape Verde, inayoshiriki Kombe la Dunia kwa mara ya kwanza, ilionyesha nidhamu kubwa ya kujilinda huku kipa wao mkongwe Vozinha akiwa shujaa wa mchezo kwa kuokoa mashambulizi mengi ya Wahispania.
Nayo Saudi Arabia iliendelea kuonyesha ushindani mkubwa kwa kutoka sare ya mabao 1-1 dhidi ya Uruguay. Matokeo hayo yameifanya kundi H kuwa wazi kabisa huku timu zote nne zikianza kampeni zao kwa pointi moja.
Baada ya raundi ya kwanza ya mechi, hakuna timu iliyofanikiwa kujitenga katika makundi G na H. Hali hiyo inaongeza ushindani mkubwa kuelekea michezo ijayo ambapo kila pointi itakuwa muhimu katika harakati za kufuzu hatua ya mtoano.
Ratiba ijayo ya kundi G itashuhudia Ubelgiji ikicheza dhidi ya Iran huku Misri ikivaana na New Zealand. Katika kundi H, Uhispania itamenyana na Saudi Arabia wakati Uruguay itakipiga na Cape Verde.
