Michuano ya Kombe la Dunia 2026 inaendelea leo kwa mechi tatu za hatua ya 32 bora zinazotarajiwa kuwa na ushindani mkubwa, huku mataifa sita yakipambana kuwania tiketi ya kutinga hatua ya 16 bora.
Mchezo wa kwanza utawakutanisha mabingwa mara tano wa dunia, Brazil, dhidi ya Japan kuanzia saa 2:00 usiku (EAT). Brazil wataingia wakiwa na presha ya kuthibitisha ubora wao, wakati Japan wakisaka kuendeleza safari yao ya kihistoria kwa kuiondoa moja ya timu kubwa duniani.
Baadaye, Ujerumani itashuka dimbani dhidi ya Paraguay saa 5:30 usiku (EAT) katika mchezo mwingine unaotarajiwa kuwa wa ushindani mkali. Wajerumani wanahitaji ushindi ili kuendelea na ndoto ya kurejesha taji la dunia, huku Paraguay wakitaka kufanya moja ya maajabu makubwa ya mashindano.
Mchezo wa mwisho wa siku utawakutanisha Uholanzi na Morocco kuanzia saa 10:00 alfajiri (EAT). Morocco watajaribu kuendeleza rekodi yao ya kushangaza kwenye michuano mikubwa, huku Uholanzi wakisaka nafasi ya kuendelea mbele.
Katika hatua hii ya mtoano hakuna nafasi ya kurekebisha makosa. Timu itakayoshinda itatinga hatua ya 16 bora, huku itakayopoteza ikiaga rasmi mashindano. Mashabiki wa soka duniani wanatarajia usiku mwingine wa burudani, presha na drama za Kombe la Dunia.
