Safari ya Japan katika Kombe la Dunia 2026 imefikia tamati kwa maumivu makubwa baada ya kufungwa 2-1 na Brazil katika hatua ya 32 Bora. Bao la dakika za mwisho kutoka kwa Gabriel Martinelli liliwapa Selecao ushindi wa kusisimua na tiketi ya kutinga hatua ya 16 Bora.
Japan walikuwa wa kwanza kupata bao kupitia Kaishu Sano dakika ya 29 na kwenda mapumzikoni wakiwa mbele. Hata hivyo, Brazil walirejea kwa nguvu kipindi cha pili, huku Casemiro akisawazisha dakika ya 56 na kurejesha matumaini ya mabingwa hao mara tano wa dunia.
Mchezo ulionekana kuelekea muda wa nyongeza, lakini katika dakika ya 90+5, Gabriel Martinelli alifunga bao la ushindi lililowazamisha Japan na kuamsha shangwe kubwa kwa mashabiki wa Brazil, huku baadhi ya mashabiki wa Japan wakishindwa kuficha maumivu yao baada ya ndoto yao kuvunjika kwa sekunde za mwisho.
Kiungo Bruno Guimarães aliendelea kung’ara katika mashindano haya baada ya kutoa pasi yake ya nne ya bao (assist), akiendelea kuwa mmoja wa wachezaji muhimu wa Brazil kuelekea hatua zinazofuata za Kombe la Dunia.
Kwa ushindi huo, Brazil wamefuzu hatua ya 16 Bora na kuendelea na harakati za kusaka taji lao la sita la Kombe la Dunia, wakati Japan wanaondoka mashindanoni wakiwa wameonyesha moyo mkubwa wa kupambana licha ya kumaliza safari yao kwa uchungu wa bao la dakika za mwisho.
